4 Ekonomalaš ja hálddahuslaš váikkuhusat
Go Divttasvuotna ovttastahttojuvvo
hálddašanguvlui, de meroštuvvojit dievaslaš ekonomalaš váikkuhusat
boahtit máksit sullii 4,5 - 5 mill kr. Lea eaktuduvvon ahte golut
mat čuožžilit go Divttasvuona suohkan ovttastahttojuvvo guvlui,
galget goastiduvvot daid bušeahttarámmaid siskkobealde mat ain
gustojit iešguđet departemeanttain.
Golut mat čuožžilit jus hálddašanguovlu ain
eambbo viiddiduvvo, fertejit árvvoštallojuvvot jahkásaš
bušeahttaovddidemiid oktavuođas.
Ođđa § 3-1 árvalus lea hálddahuslaš álkidahttin,
danne go boahttevaš viiddideamit sáhttet čađahuvvot
láhkaásahusrievdadeami bokte, almmá láhkarievdadusa haga.
Kultur- ja girkodepartemeanta
á r v a l a :
Ahte Majestehta Gonagas dohkkeha ja vuolláičállá
proposišuvdnaevttohusa mii ovddiduvvo Stuoradiggái láhka
Geassemánu 12. b. 1987 nr. 56 lága Sámedikki ja sámi
vuoigatvuođaid hárrái rievdadeami birra.
Vi HARALD, Norges Konge,
d u o đ a š t i t :
ahte dáhttut Stuoradikki mearridit lága
Geassemánu 12. b. 1987 nr. 56 lága Sámedikki ja sámi
vuoigatvuođaid hárrái rievdademiid, dán árvalusa mielde.
Árvalus Láhka Geassemánu
12. b. 1987 nr. 56 lága Sámedikki ja sámi vuoigatvuođaid hárrái
rievdadusaid birra
I
Geassemánu 12. b. 1987 nr. 56 lágas Sámedikki ja
sámi vuoigatvuođaid hárrái, galgá
§ 3-1 čuodjat ná:
§ 3-1 Definišuvnnat
Dán kapihttalis
oaivvilduvvo:
1. sámegiela hálddašanguovlluin: dat gielddat maid Gonagas
láhkaásahusa bokte lea mearridan galget gullat sámegiela
hálddašanguvlui
2.almmolaš orgánain: juohke stáhta ja gieldda orgána,
3.báikkálaš almmolaš orgánain
hálddašanguovllus: juohke gieldda, fylkkagieldda ja stáhta
orgána mas lea bálvalanviidodahkan olles gielda dahje oassi
gielddas sámegiela hálddašanguovllus,
4.guovllu almmolaš orgánain
hálddašanguovllus: juohke fylkkagieldda ja stáhta orgána
mas lea bálvalanviidodahkan ollásit dahje muhtun muddui gielddat
sámegiela hálddašanguovllus, muhto mii aŋkke ii leat
riikkaviidosaš.
II
Láhka gustogoahtá dan rájes go Gonagas dan
mearrida.