4.5.4 St.dieđáhus
nr 34 (2001–2002)
St.dieđáhusa
nr 34 (2001–2002) Kválitehta ođasmahttin
sámi alitoahpus ja dieđas
lea Oahppo- ja Dieđadepartemeanta dál
dolvon Stuoradikki gieđahallamii. Dieđáhus
lea meroštan oasi hástalusain
ja dárbbuin maidda Stuoradiggi lea bidjan
deattu kápihttalis 2.2.5.8. Dieđáhus
sisdoallá olu álgagiid
maid ulbmil lea nannet sámi oahpu ja dutkama.
Dáid gaskkas lea e.e. evttohuvvon lasihit
bestema sámi dutkamii universitehtain ja
allaskuvllain ja Norgga Dieđaráđi
bokte. Dasalassin árvaluvvo nanosmahttit Dieđaráđi
Sámi dutkanprográmma,
ja maiddái gievrudit áššáigulli
ovttasbarggu dutkan- ja oahppoásahusaid
gaskkas.
Dieđáhus fuopmášuhttá ahte
dobbelii go geahččá,
dáidá boahtit
dárbu válbmešgoahtit čielgaseabbo
hámádaga sámi
dutkamii, buoremusat nu jos dahkkošii davviriikkalaš rámaid siste.
Danne ráđđehus áigu
vuolggahit gulaskuddama mo buoremusat oččošii áigái sámi
dutkanhámádaga
davviriikkalaš lagašovttasbarggu
veagal.
St.dieđ.34 deattuha sámi
giela nannema ja seailluheami, ja oaidná dán
erenoamaš eaktun olbmo iešipmárdussii,
identitehtii ja čánasin
iežas servodahkii. Maiddái
lea dehálaš suodjalit árbevirolaš dieđuid
mat jo doložis leat leamaš sámi
kultuvrra vuođđun,
dálgo ođđa
máhttu ovdánahtto
ja sirdo boahtti buolvvaide. Dieđáhus
geavaha áiggi fágaterminologiija ovdánahttimii
ja evttoha ahte Sámi allaskuvla oažžu
nášuvnala ovddasvástádusa
fuolahit giela nu ahte buorebut ovdána dieđafágalaččat.
Dieđáhus gavnnaha
ahte go sápmeláččaid máhttu
ja gealbu galgá vuogáiduhttot,
de berre ášši árvvoštit
ja geahčat moanaid infrastuktuvrra álgagiid
bealis oktanaga. Ráđđehus áigu
vuolggahit álgo- ja vuođđodáhtaid
organiserenbarggu sámi diliin. Ruhtadandárbbu dasa
ferte suokkardit lagabuid.
Sámediggi lea sakka deattuhan oahpaheaddji
skuvlema kápihttalis 2.5.8, mii erenomážit
lea hui vuđolaččat
gieđahallon St.dieđáhusas
nr. 16 (2001–2002) Kválitehta
ođasmahttin oahpaheaddji skuvlemis. Máŋggabealátvuohta – gáibideaddji – čuožžovaš.
