Ráhkis buohkat
Norgga sámeministtarin ja dán jagi
Davviriikkalaš sámi giellabálkkášumi – Gollegiela - geigejumi
lágideaddjiriikka bealis - lea munnje stuora gudnin sávvat eará
davviriikkalaš sámeministariidda ja sámediggepresideanttaide, ii ge
unnimusat dán jagi bálkášumi vuittiide ja árvvoštallanlávdegotti
jođiheaddjái váimmolaččat bures boahtin davviriikkalaš sámi
giellabálkkášumi - Gollegiela geigejupmái.
Davviriikkaid sámeministarat ja
sámediggepresideanttat ásahedje Gollegiella-bálkkášupmi jagis 2003.
Dat geigejuvvui vuosttaš geardde 2004:s. Giellabálkkášumi ulbmil
lea ovddidit ja suodjalit sámegielaid Norggas, Ruoŧas, Suomas ja
Ruoššas. Bálkkášupmi sáhttá geigejuvvot ovttaskas olbmuide,
joavkkuide, servviide dahje ásahusaide mat leat bures doaimmahan
giellaovddidanbarggu.
Gáhttet ja ovddidit iešguđet
sámegielaid lea hui deaŧalaš sámepolitihkalaš bargu. Erenoamážit
leat unnimus gielat rašes dilis ja dárbbašit eanet doarjaga vai
cevzet. Giella lea deaŧalaš kulturguoddi, ja hui mávssolaš sámi
identitehta dáfus. Go lágiduvvojit dilálašvuođat aktiiva ja viiddis
giellageavaheapmái, de dat lea mielde ealáskahttime giela. Dat lea
hui guovddáš oassi sámi kultuvrra viidáset ovddideamis.
Politihkkárin lea mis vejolašvuohta
lágidit dilálašvuođaid dasa ahte sámegiella oažžu árvvu ja
geavahuvvo almmolaš oktavuođain. Skuvllat ja oahpahusásahusat leat
báikkit gos sámegiel oahpponeavvut ja girjjit leat oahpaheami ja
oahppama guovddážis. Mii sáhttit lágidit sámegillii eanet arenaid,
nugo ovdamearkka dihte interneahta ja giehtatelefovnnaid. Dat lea
erenoamáš deaŧalaš nuoraide ja boahttevaš sámegielat buolvvaide.
Mii sáhttit maid fuolahit ahte eanet almmolaš dieđut livčče
gávdnamis sámegillii. Mii sáhttit maiddái juolludit ruđaid buriid
doaimmaide mat ovddidit giela.
Muhto mii eat birge daid áŋgiris
olbmuid haga miehtá Sámi geat iežaset beroštumiin barget mávssolaš
barggu iešguđet sámegielaid ovddas. Dan dihte lean mun nu ávus go
beassat odne guoktása dáin gudnijahttit. Soai geat dán jagi
juogadeaba bálkkášumi leaba Jouni Moshnikoff ja Harald Gaski.
Ovdal go geigen bálkkášumi
davviriikkalaš sámeministariid ja sámediggepresideanttaid ovddas,
de bivddán árvvoštallanlávdegotti jođiheaddji Inger Marie Gaup Eira
ovdanbuktit lávdegotti ákkastallama dasa go juste soai oažžuba
bálkkášumi dán jagi.
Lávdegotti jođiheaddjis
lea sátni
Mun giittán árvvoštallanlávdegotti
barggu ovddas maid leat bargan. Mun dieđán sidjiide lea leamaš
oalle váttis válljet bálkkášumi vuitiid daid ollu buriid
evttohusaid gaskkas mat leat boahtán lávdegoddái. Lávdegottis leat
allagelbbolaš miellahtut, geat bures dovdet sihke sámegiela ja
giellabarggu, ja maiddái sámi kultuvrra ja servodateallima.
Dál bivddán Jouni Moshnikoffa ja
Harald Gaski boahtit ovdan vuostáiváldit giellabálkkášumi oinnolaš
mearkkaid – diploma ja ruhtašeahka, ja seammás giittán dudno
goappašagaid buori ja ovdamearkkalaš barggu ovddas sámegiela
ovddidemiin.