Mánáid fuolahus ja bajásgeassin lea ovddemusat váhnemiid ovddasvástádus. Váhnemat sáhttet liikká oanehit dahje guhkit áigái dárbbašit veahki, ovdamearkka dihte váttis eallindilálašvuođa geažil. Dalle sáhttá mánáidsuodjalus veahkehit mánáid ja bearrašiid nu ahte mánáide sihkkarastá buori eallindili ja ovdánanvejolašvuođaid.
Mánáidsuodjaluseiseválddiid ovddasvástádus ja barggut leat muddejuvvon lágas suoidnemánu 17.b.1992:s, mii lea mánáidsuodjalusbálvalusaid birra.
Mánáid-, dásseárvo- ja searvadahttindepartemeanttas lea obbalaš bajitdási ovddasvástádus mánáidsuodjalussii, ja mánáidsuodjalusa hálddašeapmi fas ovddemusat gullá gieldda mánáidsuodjalussii ja stáhtii Mánáid-, nuoraid- ja bearašossodaga bokte.
Mánáidsuodjalusa deháleamos barggut:
- Addit veahki ja doarjaga.
Mánáidsuodjalus sáhttá bidjat johtui veahkkedoaimmaid mánnái ja bearrašii dalle go mánás ruovttudilálašvuođaid geažil leat earenoamáš dárbbut. Veahkki sáhttá leat nu go rávvagat, bagadallan ja veahkkedoaimmat. Dábálaš veahkkedoaimmat leat omd. doarjjaolmmoš, veajuiduhttindoaimmat ruovttus ja mánáidgárdesadji.
- Váldit vára suojeheames mánáin.
Mánáidsuodjalusas lea earenoamáš bargu váldit vára buot suojeheamos mánáin. Sii galget suodjalit mánáid fuolahusváilliid vuostá ja hehttet ahte mánát gillájit fysalaš ja psykalaš vahágiid.
- Ovddasvástádus dahkat juoidá – vejolaččat vánhemiid dáhtu vuostá
Mánáidsuodjalusas lea maiddái ovddasvástádus dahkat juoidá jus doaibmabijut ruovttus eai nákce doarvái áimmahuššat máná dárbbuid. Mánáidsuodjalus sáhttá dalle ovtta áigodahkii ovttas váhnemiiguin lágidit saji biebmoruktui, váhnen/mánáid doaibmabijuide ja ásahussii. Jus máná galgá bidjat eará báikái váhnemiid mieđiheami haga, de ferte gieldda evttohusa vuođul dakkár mearrádus dahkkojuvvot fylkkalávdegottis.
