Norga Báŋku

Norgga Báŋku lea riikka váldobáŋku, ja das lea oktovuoigatvuohta ráhkadit báberruđaid ja minttaid. Báŋku addá loanaid ja vuostáiváldá ruđaid norgga fitnodatbáŋkkuin ja seastinbáŋkkuin, ja das lea dehálaš rolla máksinsystemas, earet eará dat ahte doaimmaha ruhtaáššiid báŋkkuid gaskka.

Norgga Báŋku doaimmaha ruhta- ja valuhtapolitihka. Ruhtapolitihka njuolggadusat leat mearriduvvon 29. beaivvi njukčamánus 2001 láhkaásahusas, gos daddjo ahte báŋku galgá stivret vuollegis ja dássedis inflašuvnna guvlui. Báŋku analysere norgga ekonomiija ovdáneami mas earenoamážit deattuha ruhtadanmárkaniid dilálašvuođaid, ja buktá fágalaš rávvagiid ekonomalaš politihkkii. Norgga Báŋku ráhkada maid báŋkostatistihka ja statistihka mii čájeha máksinbalánssa olgoriikkaid ektui.
Norgga Báŋkkus barget 547 bargi (31.12.2005). Eatnasat barget váldokántuvrras Oslos, gos maid lea Norgga Báŋkku báberruđaid deaddelanbáiki. Norgga Báŋkkus leat muđui ossodagat New Yorkas ja Londonis.