Gielda- ja guovludepartemeanta
lohpida Mearrasámi Studerensearvái doarjjan 250 000 ruvnno
Nordlándda ovdaprošektii ”Plussa Smávvaservodagaide”. Prošeavtta
ulbmilin lea oaččuhit báikkálaš ressursaolbmuid ráhkadit
positiivvalaš ovdáneami iežaset giliin.
Dát prošeakta lea okta máŋgga
gállinprošeavttain Gielda- ja guovludepartemeantta vuolde mat leat
dan várás ahte ovdánahttit smávvaservodagaid.
Ovdaprošeavttas galgá boahtit
oahpahusprográmma áŋggirdeddjiide, báikkálaš bargojođiheddjiide ja
ressursaolbmuide geat hálidit leat fárus ovdánahttimis
smávvaservodagaid.
Prográmma bokte galget nu
gohčoduvvon ”giliráđit”, čoahkkanan ressursaolbmot, beassat oahppat
earret eará prošeaktajođiheami, prošeaktaovdánahttima,
organisašunhuksema ja ressursakártema. Diet galgá dagahit ressursa
olbmuid vel čeahpibun leat positiivvalaččat mielde ovdánahttimis
iežaset lagasbirrasa.
Demokratiija, mieldemearrideapmi,
aktiivvalaš ássit ja politihkalaš váikkuhanfápmu leat prográmma
deaŧalaš oasit. Dát bargovuohki galgá geahččaluvvot Nordlándda
suohkaniin Flakstadas, Lurøyas, Trænas ja Divtasvuonain ja juohke
suohkanis guovtti smávva gilážis.
- Mus lea stuora jáhkku dán
bargovuohkái. Dás lea sáhka čohkket daid buriid návccaid mat
báikkálaš servodagain leat vai dat šattaše gergoseabbun váldit
ovddasvástádusa iežaset ovdáneamis. Departemeanta atná deaŧalažžan
ahte dat vásáhusat ja oahppu mat dán gállinbarggus Nordlánddas
bohtet, galggaše boahtit ávkin maid eará suohkaniidda ja smávva
báikkiide, dadjá stáhtačálli Inge Bartnes Gielda- ja
guovludepartemeanttas.