Ođđa láhkaásahus
Láhkaásahus sámelága giellanjuolggadusaide
Mearriduvvon Kultuvra- ja girkodepartemeanttas ođđajagemánu
2. 2003 lága geassemánu 12. 1987 nr. 56 Sámedikki ja eará sámi
vuoigatvuođadiliid (sámeláhka) §§ 3-7 ja 3-10 láhkavuđđosiin.
§ 1.Bearráigeahčču jna.
Kulturdepartemeanta geahččá bearrái
sámelága kapihttala 3 njuolggadusaid ja dán láhkaásahusa
čađaheami.
Buot almmolaš orgánat, maid
sámelága kapihtal 3 ja dát láhkaásahus siskkildit, leat geatnegasat
fuolahit, ahte njuolggadusat čuvvojuvvojit.
Juohke orgánas lea ovddasvástádus
fuolahit, ahte das leat gelbbolaš sámegielat bargit.
§ 2.Almmolaš orgánaid virgelohpenjuolggadusat
Gos lea geavatlaččat ja ruđalaččat
ávkkálaš, berrejit máŋga orgána, maid sámelága kapihtal 3 ja dát
láhkaásahus sikkildit, ovttasbarggus čađahit sámegiela oahpaheami.
Orgánaid virgehasain, geaidda addojuvvo virgelohpi oahpahallat
sámegiela oahppoinstitušuvnnas, lea vuoigatvuohta oažžut bálkká
oahppoáiggis. Oassálas bálkámáksámuš sáhttá addojuvvot, go oahppu
siskkilda eambbo go dan maid orgána dárbbaša ja go oahppu ii leat
njuolgga dárbbašlaš virgái.
Eaktun oažžut virgelobi bálkkáin
lea, ahte virgehas maŋŋá virgelobi geatnegahttá iežas bargat orgána
ovddas dihto áiggi maŋŋá go oahpaheapmi lea loahpahuvvon.
Geatnegasvuođabálvalus galgá váldonjuolggadusa mielde leat guovtti
dan mađe go virgelohpeáigi ja galgá dábálaččat álggahuvvot
dakkaviđe maŋŋá go oahpaheapmi lea loahpahuvvon. Sáhttá
biddjojuvvot eaktun, ahte guoskevaš duođašta iežas oassálastán
oahpaheapmái.
Juos virgehas ii deavdde eavttuid
geatnegasvuođabálvalusa birra dahje ii duođaš ahte lea oassálastán
oahpaheapmái, de galgá son ruoktotmáksit govttolaš oasi goluin, mat
etáhtas leat leamaš oahpu geažil. Go leat nana buorredille- dahje
bálvalussivat, de sáhttá etáhta luohpat ruoktotmáksingáibádusas.
Vuoigatvuohta virgelohpái sámelága § 3-7 mielde ii ráddje
vejolašvuođa oažžut virgelobi eará njuolggadusaid mielde.
Maiddái orgána, man sámelága § 3-7
ii siskkil, berre addit virgehasaide virgelobi oahpahallat
sámegiela, go dárbbaša sámegiela gelbbolašvuođa.
§ 3.Doaibmaguovllu viiddideapmi
Njuolggadusat, mat leat sámelágas
§§ 3-2, 3-3 vuosttas lađđasis, 3-7 ja 3-11, gustojit maiddái
Sámediggái, Boazodoallohálddahussii, Sámi allaskuvlii ja stáhtalaš
sámeskuvllaide.
Njuolggadusat, mat leat sámelágas
§§ 3-2, 3-3 nuppi lađđasis, 3-7 ja 3-11, gustojit maidddái
Luondduhálddahandirektoráhttii ja Romssa universitehttii.
§ 4.Fápmuibidjan
Láhkaásahus biddjojuvvo dakkaviđe fápmui.
Seammás fámuhuhttojuvvo láhkaásahus ođđajagemánu 30. 1992 nr. 79
sámelága giellanjuolggadusaide.