Kulturdepartemeanta lea sádden gulaskuddamii ođas- ja áigeguovdilis áššiid mediaid buvttadandoarjaga rievdadusevttohusaid. Ráđđehusa dulbosis boahtá ovdan, ahte buvttadandoarjaga áigot áiggi mielde rievdadit ja geahpedit.
- Árvaluvvon rievdadusat dahket ortnega deaivilabbon ja geahpeda preassa sorjavašvuođa stáhta doarjagiin. Dynámalaš suorggi ovdáneami berrejit aktevrrat ieža stivret, eaige stáhta doarjagat, kulturministtar Thorhild Widvey dadjala.
Gulaskuddančállosiin čuovvulit ovddit gulaskuddamiid áššis, ja maiddái departemeantta čilgehusa preassadoarjaga rievdadeamis dulbosa dáfus neutrála mediadoarjjan 2012 ja 2013 stáhtabušeahtain.
Loga gulaskuddančállosa dás (girjedárogillii)
Gulaskuddančállosis árvalit rievdadit ortnega golmma láhkai. Vuosttažettiin árvalit, ahte mediat, mat leat stuorámusat dahje áidna almmusteaddjit iežaset báikkis, ja maid preanttus lea 4000 ja 6000 gaskka, eai šat oaččo doarjaga. Dasto departemeanta árvala ođđa bajimuš doarjjaráji. Doarjjarádji mielddisbuktá, ahte doarjja ii sáhte leat stuorát go 40 proseantta doaibmagoluin, guđege doarjjaobjektii. Loahpas árvalit vel ráddjet Mediageahču vejolašvuođa spiehkastit láhkaásahusa mearrádusain.
Ođđa doarjjaortnet ii sáhte fámuiduhttot ovdalgo EFTA geahččoorgána (ESA) lea dohkkehan dan. Buvttadandoarjaga ođđa ortnega árvalus notifiserejuvvui ESA:i geassemánu 21. b. 2013. Jos gulaskuddama vuođul sáhttet doalahit árvalusaid, de almmuhit ESA:i divustemiid birra. Departemeantta ulbmil lea fámuiduhttit ortnega doarjjajagi 2014.
