Ráđđehus almmuha Barentsábi hálddašanplánas, ahte ásahuvvo
birasriskkaid ovttasbargoforum, man bargu laktása dán áhpeguovllu
fáhkka nuoskkideapmái. Ráđđehus hálida dan láhkai nannet
birasriskkaid árvvoštallanbarggu. Riddodoaimmahat jođiha foruma ja
dasa oassálastá viiddis joavku relevánta almmolaš
ásahusaid.
- Mii hálidat buoridit guovllu
riskaovdáneami geahču, erenoamážit fáhkka oljonuoskkideami ja
mearrajohtolaga oktavuođas. Dán riskka ferte sáhttit gieđahallat
buoremus lági mielde, guolástus- ja riddoministtar Helga Pedersen
dadjala.
Go davviguovlluid petroleumdoaimmat
lassánit, daid mielde lassána maiddái mearrajohtolat, ja gáibiduvvo
buoret gearggusvuohta. Dehálaš oassi dán barggus lea ráđđehusa
sávaldat ásahit geatnegahttojuvvon borjjastanfávlliid Várggáid ja
Røst gaskkas, 30 nauhtalaš miilla rittu olggobealde, dan láhkai
geahpedit bártidanvára. Ráđđehus ohcá dál ON
mearrajohtolatorganisašuvnnas IMO:s lobi ásahit dakkár fásta
borjjastanfávlliid. Nubbi oassi mearrasihkkarvuođabarggus lea
Várggáid johtolatguovddáš, mii doaibmagoahtá jagi 2007.
Dán vahku álggus vuolláičálle Norga
ja Ruošša Barentsábi mearrasihkkarvuođa ovttasbargosoahpamuša.
Ásahuvvo earret eará vuogádat, man vehkiin buorebut dihtet guđe
fatnasat johtet guovllus ja makkár gurpmiin.