Vai bargu boazodoalu hálddašemiin nannejuvvo, lea Ráđđehus mearridan ahte Eanandoallo- ja biebmoministtar ovttastahttá Stáhta eanandoallohálddahusa (SEH) ja Stáhta boazodoallohálddahusa (SBH), lassin dása ahte ovttadahkii Álttás sirdojuvvojit muhtun fágadoaimmat SEH:as SBH:ii. Áigumuš lea ahte ovttastahttin galgá leat doaimmas 2014 suoidnemánu 1.beaivvi rájes. Boazodoallostivra bisuhuvvo nu movt dál.
SBH galgá veahkehit joksamis boazodoalopolitihka mihttomeriid, ja láhčet politihka beaktilis čađaheami. SBH:s lea ovddasvástádus hálddašit boazodoallolága ja boazodoallošiehtadusa váikkuhangaskaomiid. SBH:s lea boazodoallostivrra čállingoddi ja galgá doaimmahit boazodoallostivrra mearrádusaid seammás go hálddahusas maiddái lea guovddáš ja dehálaš bagadallandoaibma ealáhusa ektui. Dasa lassin lea SBH EBD:a doarjja- ja čielggadanásahus.
Vai galgat joksat boazodoallopolitihkalaš mihttomeriid de lea dehálaš ahte SBH ovdánahttojuvvo vai rievdá hálddahusásahussan mas leat direktoráhttadoaimmat. Viidáset ahte SBH nanne gelbbolašvuođastis resursa- ja areálahálddašeamis, ja maiddái juridihkalaš gelbbolašvuođa. Lassin dása de lea dehálaš áimmahuššat ja viidáset ovdánahttit hálddahusa sámegielat ja boazodoalu gelbbolašvuođa.
SEH ja SBH ovttastahttin, seammásgo muhtun fágabarggut sirdojuvvojit (dálá) SBH:ii SEH:as, dagaha buoret fágabirrasa ja ahte gelbbolašvuohta nannejuvvo SBH:as. Seammás olahat beaktilvuođavuoittuid go ovttastahttit oktasašbálvalusaid. Ovttastahttin ii mearkkaš ahte bargit šaddet molsut bargobáikki eaige gártta heaitet virggiinge. Viidáset ovttastahttit sihkkarastá boazodollui buoret bálvalus- ja bagadallanfálaldaga. Ráđđehusa ovttastahttima mearrádus lea Sundvollen-julggaštusa mihttomeriid mielde namalassii ahte álkidahttit eanandoallobyrokratiija.
- Mun árvvoštalan ášši nu ahte SEH ja SBH ovttastahttin nanne sihke resursa- ja gelbbolašvuođa boazodoalu boahttevaš hálddašeamis, ja nu láhččet buoret bargovejolašvuođa joksamis boazodoallopolitihkalaš mihttomeriid, dadjá eanandoallo- ja biebmoministtar Sylvi Listhaug.
