Searvadahttin- ja girjáivuođaossodat (SGO) bargá searvadahttin- ja girjáivuođapolitihkain sisafárrejeaddjiid ektui ja álbmoga ektui muđuige. Ossodagas lea ovddasvástádus oktiiordnet politihka doaibmaváillagiid várás.
Searvadahttin- ja girjáivuođaossodagas lea ovddasvástádus háhkat dorvoohcciide orohagaid, sidjiide oahpahit dárogiela ja servodatoahpu ja sin gealbudit searvat bargoeallimii ja/dahje sidjiide oahpu addit oahpistanprográmmaid bokte mat leat ráhkaduvvon riikii easkka boahtán rávis sisafárrejeaddjiid várás, ja sidjiide fállat dulkon- ja jorgalanbálvalusaid. Ossodat bargá maiddái rásismii ja vealaheapmái gulli gažaldagaiguin, ja das lea maid ovddasvástádus lágas ja gildosis vealaheami vuostá čearddalašvuođa, oskku ja dakkáraččaid geažil (vealahuslágas). Dasto lea ossodagas ovddasvástádus lágas Norgga stáhtalahttovuođa birra (stáhtalahttolágas). SGO geahččala láhčit dilálašvuođaid nu ahte buohkat ožžot seamma vejolašvuođaid oassálastit Norgga servodagas ja dat gulahallá eaktodáhtolaš organisašuvnnaiguin ja oskobirrasiiguin.
Suorgeovddasvástádusprisihppa sisttisdoallá ahte iešguđet surggiid ja hálddahusdásiid fágaeiseválddiin lea iežaset surggiin seamma ovddasvástádus olbmuin geain lea sisafárrejeaddji duogáš, go eará olbmuin ge. SGOas lea erenoamáš ovddasvástádus ovddidit ja oktiiordnet dán ášševiidodaga politihka, ja sihkkarastit ahte girjáivuođa- ja searvadahttinoaidnu lea buot fágaeiseválddiid barggu ja politihkkaovddideami lunddolaš oassi.
Departemeanttas lea SGOa ovddasvástádus čuovvolit Searvadahttin- ja girjáivuođadirektoráhta (SGDi) ja Sisafárrejeaddjiid ja eiseválddiid gaskasaš gulahallanlávdegotti (SEG). Vealahuslága geavaheami goziha Dásseárvo- ja vealahusáittardeaddji ja oktasaš Dásseárvo- ja vealahuslávdegoddi, maid Mánáid- ja dásseárvodepartemeanta galgá hálddašit.
