Stáhta penšunfoanda ásahuvvui juovlamánu 20. beaivvi 2005 lágain nr 123. Stáhta penšunfoanda lea vuolggahuvvon ovdalaš Stáhta petroleumfoanddas ja Álbmotoadjofoanddas. Diet ođđa ásahus fievrreda dien guovtti foandda doaimma viidáseappot. Danin ii leat Stáhta penšunfoanddas sierra stivra ii ge sierra hálddahus.
Fondii gullá Stáhta penšunfoanda olgoriikkat (ovdalaš Stáhta petroleumfoanda) ja Stáhta penšunfoanda Norga (ovdalaš Álbmotoadjofoanda). Olgoritoassi biddjojuvvo kontui mii lea Norgga Báŋkkus. Vuosteárvu hálddašuvvo dárkilit njuolggadusaid mielde maid Ruhtadandepartemeanta mearrida. Siseatnanoassi fievrreduvvo kapitálan Álbmotoadjofondii. Vuosteárvu hálddašuvvo dárkilit njuolggadusaid mielde maid departemeanta mearrida.
Veaháš eanet Álbmotoadjofoandda birra
Álbmotoadjofoandda doaimma regulerejit váldonjuolggadusat maid Stuoradiggi lea mearridan geassemánu 20. beaivvi 1997. Ot.prp. nr. 2 (2005-2006) Stáhta penšunfoandda lága birra dieđihuvvui ahte Ruhtadandepartemeanta galggai dieid váldonjuolggadusaid sadjái ráhkadit Stáhta Penšunfondii Norga hálddašeapmái njuolggadusaid, mat galget boahtit sierra láhkaásahussan. Dat dagašii ahte šaddá eanet seammalágan vuohki movt mearridit njuolggadusaid Stáhta penšunfoandda olgorit- ja siseatnanfoanddaid hálddašeapmái. Láhkaásahus evttohus ovddiduvvui Stuoradiggái Rievdaduvvon našunálbušeahtas 2006 gč. St.meld. nr. 2 (2005-2006) Departemeanta bargá dan ektui ahte láhkaásahus mii guoská dasa movt Álbmotoadjofoanda hálddaša Stáhta penšunfoandda Norga doaibmagoahtá ođđajagimánu 1. beaivvi 2007.
Álbmotoadjofoanda hálddašii 2005 loahpas 191,3 mrd. ruvnno. Reanttuid bidjamiid márkanárvu lei 140,7 mrd. ruvnno. Dain ledje biddjojuvvon 112,3 mrd. ruvnno stáhta- ja stáhtadáhkiduvvon árvobáhpiriidda, ja dain lei 108,1 mrd. ruvdno biddjojuvvon kontoloatnan stáhtii. 28,5 mrd. ruvdno lei biddjojuvvon priváhta ja suohkaniid obligašuvnnaide ja sertifikáhtaide. Foanddas lei 2005 loahpas 7,2 mrd. ruvnno realiseretkeahtes kursavuoitu árvobáhpiriin mat rentejit.
Jahkemolsašumis lei Álbmotoadjofoandda iežaskapitála hálddašeami márkanárvu 50,6 mrd. ruvnno, ja dain lei 41,9 mrd. ruvdno biddjojuvvon norgga oasusárvobáhpiriidda. Dat oassi mii lea biddjojuvvon norgga oasusporteføljii, lea juogaduvvon 40 oasussearvái, ja investeremat mat leat dahkkon Danmárkkus, Suomas ja Ruoŧas leat juogaduvvon 31 oasussearvái. Foanddas lei 22,8 mrd ruvnno realiseretkeahtes kursavuoitu iežaskapitála hálddašemiin.
Álbmotoadjofoandda boađus (mas leat mielde realiseretkeahtes vuoittuid rievddadeamit) lei 15 861 mill. ruvnno 2005:s. Dat mearkkaša ahte ollislaš kapitála bohtosa dienasvuoitu lea 9,0 pst. Sullasaš vuoitu 2004:s lei 10,6 pst. Reanttuid hálddašeami vuoitu lei 2005:s 2,8 pst. , ja norgga ossosiid ja vuođđofoandaduođaštusaid vuoitu lei 31,9 pst. Oasushálddašemiid vuoitu muđui Davviriikkain lei 25,1 pst. Oasushálddašemiid vuoitu Norggas lei 8,6 proseantačuoggá unnit 2005:s go oasusinvesteremiid referánsaportefølje vuoitu, maid Álbmotoadjofoandda stivra lea mearridan váldoindeaksan Oslo Børsas. Reantoporteføljas lei seamma áigodagas 0,9 pst. unnit vuoitu, go bálddastahttá referánsaporteføljiin. Oasusinvesteremat muđui davviriikkain adde 0,6 proseantačuoggá lassivuoittu, go geahččá dan referánsaporteføljii maid stivra lea mearridan galgá leat FTSE NOREX 30. Indeaksa sisttisdoallá 30 stuorámus ja eanemus likvida oasusservviid Davviriikkain. Norgga searvvit mat leat mielde, leat váldojuvvon mielde foandda referánsaportefølje árvvoštallama vuođul.
Viđajagi áigodagas 2001 rájes 2005 rádjái, lea gaskamearálaš jahkásaš vuoitu leamaš 8,2 pst. ollislaš portefølje ektui, mii lea 0,8 proseantačuoggá unnit go referánseportefølje vuoitu. Norgga oasusporteføljes lea seamma áiggis leamaš gaskamearálaš jahkásaš vuoitu 11,7 pst., mii lea 0,7 proseantačuoggá eanet go referánsaportefølje. Reantoporteføljes lei gaskamearálaš jahkásaš vuoitu 6,8 pst. seamma áigodagas, mii lea jahkásaččat 0,9 pst. unnit vuoitu referánsaportefølje ektui. Muđui lei davviriikkalaš oasusinvesteremiin gaskamearálaččat 2,1 pst. vuoitu jagiin 2001 – 2005, mii lea sullii seamma dássi go referánsaporteføljes. Álbmotoadjofoandda norgga oasusportefølje lea maŋemus viđa jagis sirdašuvvon oalle muddui referánsaportefølje 3,8 proseantačuoggá ektui.
Álbmotoadjofoandda hálddašeami bohtosat lea dárkileappot čilgejuvvon dáppe: Kredittmeldinga 2005 mii almmuhuvvui 7. beaivvi cuoŋománus 2006.
