Per Mikael Utsi luobai duorastaga stivraságadoallevirggis go čielggai ahte ii lean vejolaš oažžut čoahkkái stivrra gos visot bellodagat leat mielde. Dievasčoahkkin botkejuvvui maŋgii. Bellodatjođiheaddjit jotke šiehtadallamiid olles beaivvi muhto go dievasčoahkkin fas čoahkkinii dii.16.00. čielggai ahte sii eai lean nagodan olahit máŋgelágán čovdosii.

Garra digaštallan
Ingrid Inga dieđihii ahte Sámiid Riikkabellodat ii háledan namuhit evttohasaid stivrii ja sii eai sáhttán buorrin váldit eará bellodagaid "iešráhkaduvvon čovdosiid". Son oaččui dakkaviđe vuostehagu Håkan Jonssonis (JoF) gii oaivvildii ahte SáR leai láhtten gutneheapmin smávva bellodagaid vuoste. Lars-Erik Fjellström (LPSS) gávnnahii ahte dal gávdnui njeallje sierralágán joavkkut dievasčoahkkimis ja ahte ii oktage dain leai eanetlogus.

Válgavuohki
Sámediggi mearridii loahpalaččat ahte geavahit propošunalalaš válgavuogi, sámediggeortnega mielde galgá nu dahkat jus goalmmát oassi lahtuin gáibida dan.

Stivra ja stivraságadoalli
SÁMIT ja Sámiid Riikkabellodat eai namuhan evttohasaid stivrii. Sámediggi válljii čuovvovaš olbmuid stivrii:

Karin Wannar (Guovssonásti), su várrelahtu Marita Stinnerbom (Guovssonásti), Håkan Jonsson (Jakt- och fiskesamerna), su várrelahttu Lars-Paul Kroik (Álbmut), Josefina Skerk (Jakt- och fiskesamerna), su várrelahttu Agneta Rimpi (Jakt- och fiskesamerna), Helena Dådring (Vuovdegat), su várrelahttu Lars-Erik Fjellström (Landspartiet Svenska Samer), Sara Larsson (Min Geaidnu), su várrelahttu Odd Willenfeldt (Min Geaidnu).

Sara Larsson válljejuvvui ođđa stivraságadoallin. Sámiid Riikkabellodat, SÁMIT, Guovssonásti ja politihkalaš vildon Ronny Svarto eai oassálastan mearrádusas.