31 lahtu
Sámedikki 31 lahtu válljejuvvojit almmolaš válggaid bakte juohke njealját jagi. Sullii 8 000 dan 20.000-35.000 sápmelaččas maid jáhkkit ássat Ruoŧas leat dássožii čálihan iežaset Sámedikki jienastuslohkui. (Eai gávdno sihkkaris logut, duššefal meroštallamat das man olu sámit Ruoŧas jurá leat.)

Sámiid sajádat
Sámediggi movttidahttá beroštumi sámi oassálastimii servodatáššiin ja politihkas mii guhkilmasat nanusnuhttá sámi identitehta. 1977:s nannii Ruoŧa riikkabeaivi ahte sámit leat Ruoŧa eamiálbmot. 2010:s mearridii Ruoŧa riikkabeaivi dahkat rievdadusaid vuođđolágas 2011 rájes. Okta rievdadus lea ahte sámit dohkkehuvvojit sierra álbmogin Ruoŧas. Eamiálbmogis leat kultuvrralaš rievttit muhto álbmogiin leat maiddái politihkalaš rievttit.

Oppalaš ulbmil
Sámepolitihka oppalaš ulbmil lea doaibmat ealli sámi kultuvrra ovddas mas ekologalaš guoddevaš boazodoallu ja iežá sámi ealáhusat leat vuođđun.

Eiseváldi
Sámediggi lea almmolašrievttálaččat ráđđehusa vuollásaš eiseváldi. Sámi áššit Ruoŧas gokčet olu surggiid muhto Eanadoallodepartemeanttas lea buohtalastinovddasvástádus sámi áššiin. Doppe gávdno ossodat mii bargá luondduriggodat- ja sámiáššiiguin. Sámedikki hálddahus lea Gironis. Sámedikkis leat báikkálaš čállingottit  Johkamohkis, Deartnás ja Staares.

Duppál rollat
Sámediggi Ruoŧas lea sihke stáhtalaš eiseváldi ja álbmotválljen sámi parlameanta. Sámedikki organisašuvdna sulastahttá gielddaid gos maiddái gávdnojit sihke politihkkárat ja virgeolbmot.

Alla gáibádusat
Stáhtalaš eiseváldin ferte Sámediggi čuovvut njuolggadusaid stáhta reglerenreivviin ja ollu lágaid ja láhkanjuolggadusaid. Maŋemus láhkarievdadus sámediggelágas (SFS 1991:1433) čielggada ráji gaskal Sámedikki politihkalaš oasi ja eiseváldeoasi. Ođđa njuolggadus lea ásahuvvon mii mearkkaša ahte hálddahusáššit galget gieđahallojuvvot lávdegottiin dehe stivrras eaige dievasčoahkkimis.