Organisašuvdna
Sámediggi lea sihke álbmotválljen orgána ja stáhtalaš eiseváldi. Sámedikki bargogohččosat leat reglerejuvvon sámediggelágas (SFS 1992:1433). Sámedikkis lea hálddahus gos virgeolbmot hoidejit beaivválaš eiseváldedoaimmaid ja maiddái politihkalaš dássi álbmotválljejuvvon politihkkáriiguin.
Ii gávdno oktage eiseváldi Ruoŧas mii sulastahttá Sámedikki. Sámediggi lea sámiid riikkabeaivi muhto dan sáhttá maiddái buohtastit gielddalaš organisašuvnnain. Dattege ii leat Sámedikkis vearrogáibidanriekti ja dat ii sáhte ásahit lágaid.
Politihkalaš stivrejupmi
Sámedikki politihkalaš stivrejupmi doaimmaha Sámedikki dievasčoahkkin ("sámiid riikkabeaivi") ja Sámedikki stivra ("ráđđehus"). Sámedikki dievasčoahkkimis lea čoahkkinjođihangoddi mii ráhkkanahttá ja ovddasvástida dievasčoahkkima čoahkkimiid.
Hálddahus
Hálddahusas lea beaivválaš ovddasvástádus doaimmahit eiseváldedoaimmaid. Sámediggi stáhtalaš eiseváldin gullá Báikegoddedepartemeantta vuollái. Váldohálddahus lea Gironis ja báikkálaš čállingottit gávdnojit Johkamohkis, Deartnás ja Staares. Hálddahusa organisašuvdna lea juhkojuvvon golmma ossodahkii (geahča olgešbealde).
Bargodoaimmat
Sámedikki vuođđodoaibma lea bargat ealli sámi kultuvrra ovddas. Sámi kultuvrii gullet maiddái sámi ealáhusdoaimmat. Muđui leat doaimmat reglerejuvvon sámediggelágas (SFS 1992:1433) mii cealká ahte Sámediggi galgá:
1. Mearridit stáhtadoarjagiid juolludeami birra ja Sámefoandda ruđaid juolludeami birra sámi kulturvrii ja sámi organisašuvnnaide ja iežá ruđaid juolludeami birra mat leat sámiid oktasaš geavaheami várás
2. Nammadit sámeskuvlastivrra 8 kap. 6 § mielde Skuvlalágas
3. Mearridit sámi giellabargguid mihttomeriid ja jođihit sámi giellabarggu
4. Oassálastit servodatplánemis ja geahččat bearrái ahte sámi dárbbut váldojuvvojit vuhtii, earret iežá gozihit boazoealáhusa dárbbuid eana- ja čáhcegeavaheami oktavuođas
5. Dieđihit sámi dilálašvuođaid birra ja
6. doaimmahit eará bargogohččosiid mat biddjojuvvojit Sámediggái lága dehe iežá njuolggadusa mielde (Láhka 2006:803).