Ealáhusáššit
Sámi ealáhusat leat árbevirolaččat leamaš boazodoallu, bivdu, guolásteapmi ja duodji.
Báikegoddeealáhusat
Sullii logi proseantta sámiin Ruoŧas ellet boazoealáhusas ja eatnamat boazodoallui leat sullii 50 proseantta Ruoŧa areálas. Otne barget sámit maiddái eanas báikegoddeealáhusain mat jođihuvvojit davimus Ruoŧas, dávjá olbmot kombinerejit ealáhusaid. Gávdno guovttebealalaš čatnašumit gaskal boazoealáhusa ja eará sámi ealáhusaid. Nanu boazoealáhus gos vuoigatvuohta geavahit eatnama ja čázi lea sihkarastojuvvon buorida vejolašvuođa eará ealáhusaide ovdánahttojuvvot seammás go ovdáneapmi eará sámi ealáhusain nanne boazoealáhusa sajádaga.
Ealáhusossodat
Sámediggelága mielde galgá Sámediggi doaibmat ealli sámi kultuvrra ovddas, oassálastit servodatplánemis ja bearráigeahččat ahte sámi beroštumit váldojuvvojit vuhti, earret eará boazoealáhusa beroštumiid eatnama ja čázi geavaheami oktavuođas. Sámi oaidninvuogi mielde leat sámi ealáhusat nannosit čadnon sámekultuvrii. Sámedikki ealáhusossodat lea šaddan oalle sakka maŋŋel go Sámediggi šattai guovddáš hálddahuseiseváldi boazodoallui. Earret boazoealáhusáššiiguin bargá Sámediggi maiddái eará áššiiguin mat gusket sámi ealáhusaide, biras- ja servodatplánemii.
Ovdánahttinstrategiijat
Sámedikki dievasčoahkkin lea golggotmánus 2006 dohkkehan ealáhuspolitihkalaš doaibmaprográmma ovdánahttinstrategiijaiguin boahttevaš jagiide. Doaibmaprográmma lea maiddái vuođđun Sámedikki čađahanstrategiijái báikegoddeprográmmas ja eará EO-prográmmain.