Sámedikki giellabargu
Sámedikkis leat máŋga láhkamearriduvvon doaimma ja okta lea jođihit sámi giellabarggu. Bargu lea organiserejuvvon guovtti oassái, giellaossodat mii lea ráđđeaddi ja áššedovdi, ja Sámi giellaguovddáš mas lea ovttasvástádus bargat olggosguvlui ja giela ealáskahttimiin.
Giellaossodaga bargu
Giellaossodat gieđahallá giellaáššiid ja vástida jearaldagaid olbmuin. Diehtojuohkin giellalága ja iežá giellaáššiid birra dahkkojuvvo bistevaččat. Bistevaš bargui gullo maiddái ráđđeaddin, jorgaleapmi, korrektuvralohkan, čoahkkimat, muhtin diehtoohcan ja dutkan ja maiddái báikenamaid dárkkisteapmi ja ođastuhttin . Sámediggi veahkeha dulkon- ja jorgalangaskkustemiin eiseválddiide ja earáide go lea dárbu.
Oktasaš sámi giellaovttasbargu Davviriikkain
Jagi 1974 rájis lea Davviriikkain gávdnon sámi giellalávdegoddi (SGL) gos visot giellavariatehtat leat mielde. SGL heaittihuvvui 2011:s go ii nagodan deavdit dálá dárbbuid ja hástálusaid, eandalii ruhtaváni geažil. 2013-2014 leat golbma sámedikki doaimmahan oktasaš prošeavtta giellabarggu organiseremis, Sámi giellagáldu-prošeavtta. Prošeaktaáigi lea dievvan ja juste dál (2014) ii gávdno makkárge davviriikkalaš giellaorgána.
Báikenammaráđđi
Sámedikkis lea ovddastus Báikenammaráđis. Bargojoavku ásahuvvui 2006 Sámedikkis,SOFI:s ja DAUM:as bargogohččosiin ahte hábmet háltelinjjáid ovttasdoaimmaide sámi báikenammabargui, mearridit bargomálle ja cegget njuolggadusaid sámi báikenamaid dárkkisteami várás.
Unnitlogugiellaláhka
Sámegiella lea almmolaččat dohkkehuvvon Davviriikkain go sámi giellalágat ásahuvvojedje. Cuoŋománu 1 b.2000 dohkkehuvvui sámegiella (visot variánttat) almmolaš unnitlogugiellan Ruoŧas. Ođđa láhka našuvnnalaš unnitloguid ja unnitlogugielaid birra lea leamaš fámus ođđajagimáni 1 b. 2010 rájes. Sámegiela hálddašanguvlui gullet 19 gieldda davvi-Ruoŧas.
