Ođđa meahciealliguorahallan
Direktiivvat
Direktiivvaide gullui earret eará ahte čielggadit ja analyseret meahcieallináliid ovdáneami, viidáset ovddidit ovttasráđđádallanvugiid sierralágán beroštumiid gaskal, eanet guovlluguovdasaš ja báikkálaš váikkuhanvejolašvuohta meahciealliáššiin, analyseret buhtadusdásiid ja njuolggadusaid meahciealligávdnamii boazodoalloguovllus.
Váilevaš analysat
- Sámedikki bealis mii leat beahtahallan das ahte váttisvuohta boazodoalloguovllus ii leat váldojuvvon doarvái duohtan guorahallamis. Analysat leat váilevaččat dehe eai gávdno obbanassiige go guoská sihke meahcielliid váikkuhus boazodollui, buhtadussystema mearkkašupmi ja meahciealliinventerema čađaheami boazodoalloguovllus, lohká Lars Anders Baer, Sámedikki stivraságadoalli.
Toleránsadásit dárbbašlaččat
Guorahallamii gullui maiddái ahte čuvgehit ollislaš meahcieallideaddaga sierralágán guovlluin riikkas ja vihkkedallat ođđasit toleránsadásiid earenoamážit boazodoalloguovllus. - Lea dárbbašlaš ahte farggamusat ásahit toleránsadásiid ollislaš meahcieallideaddagii juohke čearus. Guorahallama evttohus dáin osiin leat ilá oppalaččat ja eai leat doarvái čađa jurddašuvvon. Dat mearkkaša ahte hálddashuslaš eiseválddit dakkaviđe fertejit oažžut bargogohččosa ohcagoahtit čađahanmálle ja buktit ovdan evttohusaid njuolggadusaide, deattuha Lars Anders Baer.
Náššuvnnalaš veardideapmi
- Evttohuvvo ahte Sámediggi oažžu eanet ovddasvástádusa dieđihit meahcielliid váikkuhusaid birra boazodollui ja čađahit náššuvnnalaš veardideami buhtadussystema váikkuhusain boazodollui. Direktiivvaid mielde leai jurdda ahte guorahalli galggai čađahit dakkáraš veardideami buhtadussystemas muhto dat bargu ii leat dahkkojuvvon, lohka Lars Anders Baer. Muhto Sámediggi boahtá buriin movttain álgit bargat dainguin áššiiguin, deattuha Lars Anders Baer.
Guovlluguovdasaš hálddašeapmi
- Lea buorre ahte guorahallan evttoha eanet guovlluguovdasaš hálddašeami gos leanastivrrat ožžot váldoovddasvástádusa. Sii geat gillájit meahcielliin galget oažžut eanet váikkuhanvejolašvuođa, loahpaha Lars Anders Baer, stivraságadoalli Sámedikkis.
Oktavuohta
Lars Anders Baer, 070-316 20 56