Ođđa prográmmaáigodagas 2007-2013 ruhtaduvvojit guovlluguovdasaš struktuvrafoandaprográmmat sullii 8,4 milj. ruvnnuin EO-ruhtan. Dasalassin bohtet náššuvnnalaš ruhtadeamit seammá stuora summiin.

”Sápmelaš beavdegirji”
Sámit eamiálbmogin lea sierra sadji eará unnitlogujoavkkuid ektui Eurohpas. Ruoŧa ja Suoma searvansoahpamušgirjiis EO:ai gávdno searvanáššegirji mii gohčoduvvo ”sápmelaš beavdegirji”. Soahpamušgirjjis gávdnojit čilgehusat beavdegirjjiide mat leat čadnon konstitušuvdnii, e.e. addendum 2 áššegirjái CIG 86/04. Das gávdno čuovvovaš čilgehus sámi álbmoga birra:

b. Čilgehus sámi álbmoga birra
Bearráigeahčuin artihkkaliidda 59 ja 60 beavdegirjjis searvansoahpamusgirji ja searvanáššegirjjiid birra Gonagasriikka Danmárkku…Suoma republihka ja Gonagasriikka Ruoŧa várás dovddasta konferánsa geatnegasvuođaid ja dahkamušaid mat Ruoŧas ja Suomas leat sámi álbmoga ektui náššuvnnalaš ja gaskariikkalaš rievtti mielde. Konferánsa gávnnaha ahte Ruoŧŧa ja Suopma leaba nannosit mearridan ahte seailluhit ja ovddidit sámi álbmoga birgenvejolašvuođaid, giela, kultuvrra ja eallinvuogi ja bearráigeahččat ahte sámi kultuvra ja sámiid birgejupmi leat sorjjavaččat primára dienasgáldduin nugo boazodoallu sápmelaš árbevirolaš guovlluin.

Sierra EO-prográmmat
Sámediggi lea dan rájis go Ruoŧŧa searvvai miellahttun EO:as aktiivvalaččat bargan sierra prográmmaiguin sámi guovlui ceggendihte ruđalaš eavttuid šaddamii ja bargguide kultuvra- ja fitnodatossodagas. Sámi EO-prográmmat, Ulbmil 2 ja Interreg III A, maid Sámediggi ovddasvástidii áigodagas 2000-2006 leat ollislaččat juohkan 141 565 644 ruvnnu ovdánahttinprošeavttaide. Doarjagat EO:a struktuvrafoanddain gáibidedje náššuvnnalaš almmolaš mielruhtadeami 35-50 %:ain prošeavttaid ollislaš goluin.

Prográmmaáigodat 2007-2013
Áigodagas 2007-2013 leat Ulbmil 2-prográmma ja Báikegoddeprográmma (mii goitge ii leat struktuvrafoandaprográmma) muhtin muddui boahtan Ulbmil 1-prográmma sadjái. Sámiin eai leat šat iežas mearridanjoavkkut. Dan sadjái Sámediggi nammada ovddasteddjiid bearráigeahččolávdegottiide. Interreg-prográmmat ellet viidáset rievdademiin ahte sámi guovlu lea stuorrun ja ii leat šat juhkojuvvon máŋggaid prográmmaide. Lea okta oktiičadnojuvvon oasseprográmma man namma lea Sápmi ja lea Interreg IV A Davvi vuolde.

Eanet ovttasdoaibma
Guovlluguovdasaš eiseválddit, gielddat ja báikkálaš sámi fuolaheaddjit leat lahkonisgoahtán nuppiid barggus konkrehtalaš ovdánahttinprošeavttaiguin EO-prográmmaid ráma siskkobealde. Sámi institušuvnnat, organisašuvnnat, searvvit, lágádusat ja eará fuolaheaddjit leat šaddan ohcat ruđaid eará guovllus go árbevirolaš doarjjagáldduin ruhtadandihte iežaset prošeavttaid. Dat lea mielddisbuktan eanet ovttasdoaimma gielddaiguin, guovlluguovdasaš ja stáhtalaš eiseválddiiguin.

Mihttomearri
Váldo mihttomearri sámi EO-prográmmaiguin lea ahte nannet ja ovddidit sámi kultuvrra ja sámi servodateallima. Hástalus lea nannet ja seailluhit árbevirolaš ealáhusheiveheami ja seammás hábmet eavttuid ovddidandihte ođđa eallinávccalaš doaimmaid. Guhkilmas ulbmil lea sierranas ja ovddiduvvon sámi fitnodateallin mii vuođusta luonddubirrasis, kultuvrras ja árbevierus. Lea dehálaš doarjut ja ovddidit árbevirolaš sámi máhtu, alit oahpahusa ja dutkama mat leat heivejuvvon sámi dilálašvuođaide.