Sámiin lea earenoamáš sajádat
Vuođđoláhkaguorahallan man eanahearrá Per Unckel jođiha lea otne geigen smiehttamuša Ođastahttojuvvon vuođđoláhka (SOU 2008:125) justitiaministarii Beatrice Askii. Ovttamielalaš guorahallan evttoha moadde rievdadeami ráđđehushámis ja iežá láhkaásaheamis ulbmiliin ahte nannet ja čiekŋalahttit ruoŧa álbmotstivrra. Guorahallan evttoha maiddái ahte sámit dovddastuvvojit eamiálbmogin vuođđolágas. Guorahallama ágga lea ahte sámiin lea earenoamáš sajádat náššuvnnalaš unnitloguid gaskkas. Guorahallan evttoha maiddái heiveheami dálá njuolggadusas mii siskkilda ahte čearddalaš, gielalaš ja oskkolaš unnitloguid vejolašvuođat doalahit ja ovdánahttit iežaset kultuvra- ja servodateallima galget ovddiduvvot (otne lea sátni ”berrejit ovddiduvvot”).

Prinsihpalaččat dehálaš
-Vuođđoláhkaguorahallama evttohus ahte dovddastit sámiid eamiálbmogin vuođđolágas lea prinsihpalaččat dehálaš, lohká Lars Anders Baer, stivraságadoalli Sámedikkis. Dat mearkkaša ahte sámi álbmot čalmmostahttojuvvojit vuođđalágalaččat.

Eamiálbmotjulggaštus ágga
-Mon lea ilus ahte guorahallan ákkastallá iežas evttohusa dainna ahte Ruoŧŧa ON:as lea dorjon julggaštusa eamiálbmogiid vuoigatvuođaid birra. Dal gal sáhttá dadjat ahte Ruoŧŧa álggaha proseassa duohtandahkat ON:a eamiálbmotjulggaštusa, deattuha Lars Anders Baer. Julggaštus siskkilda ja nanne eamiálbmogiid vuoigatvuođaid e.e. iežaset kultuvrii, gielaide ja institušuvnnaide ja maid iešmearrideapmái áššiin maidda ieža guoskkahuvvojit.

Sámedikki rolla
Dat mii váilo evttohusas lea čielggadeapmi Sámedikki rolla ja statusa birra álbmotválljejuvvon orgánan ruoŧa álbmotstivrras. Muhto Baer lea doaivvalaš.
-Sámi bealis mii vuordit ahte dát ášši gieđahallojuvvo ráđđehusa sámepolitihkalaš bargojoavkkus. Joavku ráhkkanahttá sámepolitihkalaš proposišuvnna mii galgá geigejuvvot riikkabeaivái 2010, lohká Lars Anders Baer.

Oktavuohta:

Lars Anders Baer, stivrra ságadoalli, 070-316 20 56