Sámi Giellagáldu
Davviriikkaid golbma Sámedikki leat jođihan oktasaš prošeavtta giellaovttasbarggu doaimmaheami várás ja prošeavtta namma lea Sámi giellagáldu. Sámi giellagáldu gulai organisatuvrralaččat Sámi Parlamentáralaš Ráđi vuollái. Suoma Sámedikkis lea leamaš váldoovddasvástádus prošeavtta jođiheamis. Prošeaktaáigi lea dál nohkan.
Interreg-prošeakta
Prošeakta álggahuvvui ođđajagimánus 2013:s ja bisttii geassemánu 2014 rádjái. Váldooasi ruhtadii EU Interreg Davvi IV- prográmma, Sápmi nammasaš oasseprográmma. Golbma sámedikki, Lapin liitto Suomas ja Tromssa ja Nordlándda fylkkagielddat leat leamaš mielruhtadeaddjin. Prošeaktaáigodagas leat sámedikkit oččodan giellagáldui bistevaš ruhtadeami muhto eai leat vel lihkostuvvan.
Doaibma
Jurddan lei ahte Sámi giellagálddus galggai leat bajemus ovddasvástádus giellaáššiin ja gaskkustit giellabálvalusaid njuolga geavaheddjiide. Guovddáš galggai ovdánahttit davviriikkalaš giellaovttasbarggu ja nannet sámegiela dili Norggas, Suomas ja Ruoŧas. Sámi giellagálddu doaibma lea leamaš giellaovdánahttin, teminologiijja dohkkeheapmi, báikenamat, giellanormeren ja giellaáššiid diehtojuohkin.
Vihtta giela
Prošeakta lea bargan viđain sámegielain namalassii: oarján-, julev-, davvi-, anáraš- ja nuortasámegielain. Leat leamaš vihtta giellajuhkosa main lei fápmudus mearridit áššiin mat gusket terminologiijii, normeremii ja báikenamaide.
Desentraliserejuvvon organisašuvdna
Sámi Giellagáldu ii leat leamaš fysalaš ásahus. Bargit leat hálddahuslaččat gullan iešguđet sámedikki vuollái. Prošeavttas leat leamaš guoktenuppeloht bargi, ovccis sis leat bargan giellakonsuleantan.
Oktavuođadieđut: info(at)giellagaldu.com
