Sámi Parlamentáralaš Ráđđi (SPR) lea davviriikkalaš sámedikkiid ovttasbargoorgána ja dat lea doaibman 2000 rájes. Dát lea njealját geardi go parlamentarihkkárat čoahkkanit oktasaš konferánsii. Konferánssas gieđahallojuvvojit guokte fáttá: Davviriikkalaš sámekonvenšuvdna ja Árktalaš guovlluid ávkkástallamat. Boađusin galgá šaddat oktasaš cealkámuš mii ovddiduvvo ráđđehusaide.

- Lea deaŧalaš ja mávssolaš midjiide politihkkáriidda ovttas beassat digaštallat jearaldagaid mat gusket midjiide buohkaide Árktisas. Mii dáhpáhuvvá birrasiin? Movt galgat mii duostut daid sisabáhkkemiid mat dál áitet Árktalaš guovlluid? jearrá Håkan Jonsson Suorssás eret guhte lea Ruoŧa Sámedikki ságadoalli ja SPR ságadoalli.

Davviriikkalaš ráđđehusat ja sámedikkit leat dál proseassas mas Davviriikkalaš sámekonvenšuvnna evttohus lea meannuduvvome, ja ulbmilin lea earet eará buohtastit sámiide guoskevaš lágaid davviriikkain. Dát galgá maiddái digáštallojuvvot Ubmejes.

-Illodalan digáštallamiidda, lohká Håkan Jonsson. Mii sápmelaččat leat okta álbmot vaikko ođđa áiggi stáhtarájiid leat ráddjen min.

Konferánsii searvaba maiddái Norgga Sámedikki presideanta Aili Keskitalo, ja Suoma Sámedikki presideanta Klemmetti Näkkäläjärvi. Maiddái ruoššabealde bohtet sámi ovddasteaddjit.

Oktavuohtaolmmoš:

Håkan Jonsson,
Ordförande SPR ságadoalli
Ruoŧa Sámedikki ságadoalli
070-372 10 10