Nu go dábálaččat de leat hui olu áššit ovdan, earet iežá 19 mošuvnna sierralágán surggiin, omd sámi duohtavuođakommišuvdna mii guorahallá stáhta rihkkumiid sámiid vuoste, giellaguovddáža ásaheapmi julevsámi ja davvisámi guovlluin, ja sámi dutkanpolitihkalaš strategiija. Ođđa evttohus sámediggeortnegii galgá maid gieđahallot. Jus dát dievasčoahkkin dan dohkkeha de ferte boahtte dievasčoahkkin maiddái dohkkehit dan ovdalgo dat lea fámus.

Sámedikki ruvke- ja minerálapolicy boahtá vuordimis buktit olu digaštallama. Sávaldat lea ahte dievasčoahkkin dán háve dohkkeha evttohusa danne go ášševálbmemis eai leat ovddiduvvon vuostehágut dasa. Ovddit háve máhcahuvvui ruvkepolicyášši, ja bargojoavku mas Matti Berg, Sámiid Riikkabellodat, Marie Persson, Landspartiet Svenska Samer ja Josefina Skerk, Jakt- och fiskesamerna leat leamaš lahttun, gohččojuvvui hábmet evttohusa maid buohkat sáhttet doarjut.

Dán jagi lea eareliiggánis válgajahki go leat válggat sihke EU-parlamentii miessemánu 25 b ja riikkabeaivái čakčamánu 14 b, ja danne leat visot Riikkabeaivvi bellodatjođiheaddjit bovdejuvvon dievasčoahkkimii ja ávvudanmállásiidda., muitala Sámedikki ságadoalli Stefan Mikaelsson.

–Šaddá miellagiddevaš oaidnit váldet go vuostá min bovdehusa. Mii beassat de oaidnit beroštit go iešguđet válgagiččuin sámi áššiin, ja adno go sámi álbmot oassin oppalaš čovdosiin. Lea áigi molsut oainnu das ahte mii sámit aivve leat oassin váttisvuođain, ávžžuha Mikaelsson guhte loahpaha:

–Bures boahtin Åårii miessemánus čuovvut min álbmotválljenorgána barggu!

Olles prográmma, áššelistu ja áššegirjjiid gávnnat olgešbealde.

Oktavuođaolbmot:
Stefan Mikaelsson
Sámedikki čoahkkinjođihangotti ságadoalli,
070-251 94 97
stefan.mikaelsson@sametinget.se
Twitter: Silponah

Anna Skielta
diehtojuohkin- & preassaoktavuođaolmmoš dievasčoahkkimis,
070-527 80 39
anna.skielta@sametinget.se