Ubmeje universitehta beassá lágidit eksámena sámegieloahpaheddjiide
Ubmeje universitehta ozai golggotmánus 2013 lobi lágidit oahpaheaddjeeksámena sámegielas eatnigiellan. Dál lea Universitehtakanslarámmát dohkkehan ohcamuša.
Ubmeje universitehta ii leat ovdal leamaš dohkkehuvvon go ii leat deavdán gáibádusaid lágidit eksámena. Muhto dál oažžu universitehta lágidit sámegieloahpaheaddjeoahpu go leat:
- doarvái oahpaheaddjit dan ohppiidlogu ektui mii lea plánejuvvon
- oahpaheddjiin lea dieđalaš gealbu lingvistihkas, kulturoahpus ja ávnnasdidaktihkas
- oahpaheaddjit máhttet iešguđet sámegielaid
- amerihkálaš guosseprofessor nanusnuhttá oahpahusa
- oahpaheaddjit ožžot doarvái áiggi dutkamii ja gealboloktemii
- oahppobirrasis gávdno sihke teorehtalaš fágamáhttu ja praktihkalaš giellamáhttu eatnigieldásis
- buorit eavttut ovttasbargui omd guovttegielalašvuođa- ja unnitlogugiela oahpaheddjiiguin ja iežá sámi dutkan- ja oahppobirrasiiguin
- oahppoplánat, gurseplánat ja gursegirjjálašvuohta
- čielga ovdáneapmi oahpahusas
- dohkálaš eksámenvuohki vai sihkkarastá ahte studeanttat olahit eksámenmihtuid
Danne lea Universitehtakanslerámmát mearridan addit Ubmeje universitehtii lobi lágidit ávnnasoahpaheaddjeeksámena sámegielas eatnigiellan vuođđoskuvlla 7-9 luohká ja joatkkaskuvlla várás.