Gávcci jagi dás ovdal vuittii Murman Arkitekter arkiteaktagilvvu sárgut sámeparlameantta, muhto go Girona gávpotsirdin šaddagođii áigeguovdilin de bisánii bargu parlameantavisttiin. Dál lea Sámediggi fas bargagoahtán áššiin. Gielda lea dál evttohan Duollovári vielttis lahka gávpotguovddáža viessosaji gos lea hui várddus juohke guvlui. Sámedikki stivra lea mielas dán viessosadjái.

Eananbarggut
Sámedikki stivračoahkkimis Gironis muitalii Girona gieldda eanan- ja eksploaterenhoavda Eva Ekelund Ođđa Girongávpoga plánema ja dálá bargguid birra. Son čájehii govaid ja govvosiid das govt gávpot galgá sirdojuvvot ja muktašuvvot, ja gosa guovddáš galgá huksejuvvot. Dál juo leat visttit doppe gaikojuvvon, ja báikki galget čorget ja jalget ođđa visttiid várás.

Guovddáš sirdojuvvo
Derformašuvdna boahtá lagabui ja lagabui gávpoga. Deformašuvnnat dagahit ahte eanan luoddanaddá ja šaddet rokkiid. Dat lea dannego málbmagávdnosat leat gávpoga vuolde. Maŋemus dieđut leat ahte visot gaskal LKAB-guovllu ja gávpotviesu galgá leat gurrejuvvon ovdal 2018. Danne fertejit Girona gávpevisttiid oalle fargga sirdit. Ii leat dušše gávpotviessu mii galgá ođđasis huksejuvvot.

Visttiid sirdit dehe ođđasis hukset
Aivve fargga galget maiddái dábálaš visttit dego girku, vuojadanálddis, joatkkaskuvla ja buohcciviessu buhttejuvvot. LKAB áigu hukset ođđa fitnodathotealla Luossavárrái ja hotealla bálddas galgá beakkán Hjalmar Lundbohms- viessu čuožžut. LKAB galgá vel goasttidit 21 iežá kulturmerkejuvvon vistti, earet iežá dovddus ”bläckhornen” mii oktii áiggis huksejuvvui bargiide orrunbáikin.

Viessosadji Duollováris
Sámediggi lea ieš gáibidan ahte ođđa parlameantavisti galgá leat lahka gávpotguovddáža. Ođđa viessosadji maid gielda dál fállá lea boares ruvkedoartnaid lahka. Vaikko dál vuos lea industriijabáikin de dat šaddá vuogas sadjin Hans Murman sárgun vistái čáppa luonddus ja gos lea várddus juohke guvlui, maiddái ođđa gávpoga guvlui. Maiddái arkiteakta Hans Murman guhte dál lea manná ealáhahkii lei mielde čoahkkimis. Son čilgii oanehaččat dan barggu maid lea bargan ja daid jurdagiid mat sus ledje parlameantavistti sárggudettiin.

Gávpotguovddáža lahka
Sámedikki ođđa visti galgá leat sullii 500 mehtera ođđa Gávpotviesus eret mii šaddá gasku gávpešillju. Eanan- ja eksploaterenhoavda Eva Ekelund muitala ahte gávpotguovddáš ja gávpešillju lea juoga maid olu gironlaččat leat váillahan. Gironis ii leat dál vásedin gávpešillju dehe márkansadji, dušše stuora biilabisánanbáiki Folkets Hus ovddabealde mii adno festiválasadjin ja márkansadjin.

Prográmmabargu álgá

Sámedikki stivra lea mielas viessosadjái muhto háliida vuordit loahpalaš mearrádusain dasságo eanan- ja bákteiskosat leat gárvás. Stivra lea maiddái mearridan čállit ráđđehussii ahte bargu Sámedikki parlameantavisttiin galgá álggahuvvot. Dalle sáhttá prográmmabargu álgit, jáhkkimis buohtalaga gieldda detáljaplánenbargguin. Stáhta giddodatdoaimmahat nammada dalle prošeaktajoavkku mii galgá dárkileappot plánet vistti, omd. mii galgá čáhkat vistti sisa, gokko galgá ceggejuvvot dan viessosajis mii lea mearriduvvon jna. Olu go visot boahtá máksit? Jáhkkimis sullii 225 miljovnna kruvnno.