§ 1 Ulbmil

Álgoálbmotvuoigatvuođaid gelbbolašvuođaguovddáža ulbmil lea lasihit dieđuid ja áddejumi álgoálbmotvuoigatvuođaid ja sámi vuoigatvuođaid hárrái

§ 2 Gelbbolašvuođaguovddáža doaimmat

Gelbbolašvuođaguovddáš galgá leat fágalaččat iehčanas ásahus.

Gelbbolašvuođaguovddáš galgá čohkket, ovdánahttit, systematiseret, bajásdoallat, gieđahallat, heivehit ja gaskkustit relevánta dokumentašuvnna álgoálbmotvuoigatvuođain riikka ja riikkaidgaskasaš dásis. Gelbbolašvuođaguovddáš sáhttá maid cuiggodit, makkár dutkamuš dárbbašuvvo áigeguovdilis surggiin.

Gelbbolašvuođaguovddáža doaimmaid ulbmiljovkui gullet buohkat, geat ohcet dieđuid álgoálbmotvuoigatvuođaid birra riikka ja riikkaidgaskasaš dásis, nugo skuvllat, eaktodáhtolaš organisašuvnnat, almmolaš ásahusat ja eiseválddit. Gelbbolašvuođaguovddáš galgá ovddimusat heivehit ja gaskkustit dieđuid ulbmiljoavkkuide Norggas. Gelbbolašvuođaguovddáš sáhttá maid heivehit ja gaskkustit dieđuid eará riikkaid ulbmiljoavkkuide, jus dasa leat návccat.

Gelbbolašvuođaguovddáža bálvalusfálaldaga galgá hábmet ja geahččat ovttas eará sullasaš našuvnnalaš ja riikkaidgaskasaš fálaldagaiguin.

§ 3 Organiseren

Gelbbolašvuođaguovddáš organiserejuvvo hálddahusorgánan, mas leat sierra fápmudusat.

Guovddáža jođiha stivra, mas leat vihtta lahtu ja guokte várrelahtu.

Beaivválaš doaimmaid jođiha beaivválaš jođiheaddji.

§ 4 Stivrra nammadeapmi

Gielda- ja guovlodepartemeanta ja Sámediggi nammadit ovttas stivrra jođiheaddji. Gielda- ja guovlodepartemeanta ja Sámediggi nammadit dasto goabbáge guokte stivrralahtu ja ovtta várrelahtu. Nammadeamit dahkkojit árvaluvvon evttohasaid gaskkas. Nammadeapmi dahkko golmma jahkái.

Tromssa universiteahtta, Sámi instituhtta, Sámi allaskuvla, Olmmošvuoigatvuođaid instituhtta ja Sámeráđđi bovdejuvvojit árvalit evttohasaid stivrii. Juohke ásahus bivdojuvvo árvalit sihke nissona ja albmá evttohassan. Gielda- ja guovlodepartemeanta ja Sámediggi sáhttet ovttasráđiid bivdit eará ásahusaid ja organisašuvnnaid árvalit evttohasaid stivrii.

§ 5 Stivra

Stivra lea gelbbolašvuođaguovddáža bajimuš orgána, ja das lea bajimuš ovddasvástádus gelbbolašvuođaguovddáža doaimmain. Das lea ovddasvástádus, ahte doaimmain lea alla fágalaš dássi, ja ahte dat jođihuvvojit beaktilit ja gustovaš njuolggadusaid mielde. Stivrras lea ovddasvástádus fágalaš ovdánahttimis, resursageavaheamis ja vuoruhemiin, ja gelbbolašvuođaguovddáža doaimmaid strategiijaid ráhkadeamis. Stivra galgá ráhkadit jahkerehketdoalu ja jahkedieđáhusa, ja buktit ovdan bušeahtta- ja doaibmaplánaevttohusa. Stivra sáhttá maid bidjat virgái beaivválaš jođiheaddji, ja gelbbolašvuođaguovddáža eará bargiid beaivválaš jođiheaddji evttohusa vuođul.

Jus muhtin stivralahtuin ii beasa boahtit čoahkkimii, galgá bovdet várrelahtuid. Stivrras lea mearridanváldi, go unnimusat golbma lahtu leat mielde. Jus jienat leat dássálagaid, mearrida stivrrajođiheaddji guovttegeardán jietna.

§ 6 Beaivválaš jođiheaddji

Beaivválaš jođiheaddji galgá jođihit gelbbolašvuođa doaimmaid, ja sus lea ovddasvástádus gelbbolašvuođaguovddáža siskkáldas organiseremis daid rámmaid olis, maid stivra mearrida.

Beaivválaš jođiheaddji lea stivrra čálli, son válbme ja buktá mearrádusevttohusaid áššiin, mat ovdanbuktojit stivrii, ja sus lea ovddasvástádus stivrra mearrádusaid ollašuhttimis.

Beaivválaš jođiheaddjis lea ekonomiijaovddasvástádus, ahte doaimmat jođihuvvojit gustovaš lágaid ja njuolggadusaid mielde. Beaivválaš jođiheaddji ráhkada bušeahttaevttohusa ja jahkerehketdoalu, ja almmuha stivrii ekonomiija- ja eará áššiin, mat leat mávssolaččat gelbbolašvuođaguovddáža doaimmaid hárrái.

Beaivválaš jođiheaddjis lea mávssihanfápmu ja fápmu vuolláičállit šiehtadusaid, mat gusket gelbbolašvuođaguovddáža opmodahkii, prošeavttaide ja ovttasbargogaskavuođaide daid rámmaid olis, maid stivra mearrida.

Beaivválaš jođiheaddjis lea ovddasvástádus almmuhit rabas virggiid ja evttohit ohcciid stivrii.

§ 7 Raporteren

Gelbbolašvuođaguovddáš raportere juohke jagi Gielda- ja guovlodepartementii, Olgoriikadepartementii ja Sámediggái gelbbolašvuođaguovddáža doaimmain ja erenoamáš beroštahtti áššiin. Raporterengáibádusat leat lagabut čilgejuvvon stáhta ekonomiijanjuolggadusain ja juolludanreivviin, mat sáddejuvvojit juohke jagi.

§ 8 Fápmui boahtin

Njuolggadusat leat fámus Gielda- ja guovlodepartemeantta mearrádusa rájes.

06.03.2002

Erna Solberg

stáhtaráđđi