Kirisji

Aktisasjbarggo Kirisji Leningrad fylkan ja Divtasvuona gaskan Nordlánda fylkan álgij jagen 1992. Sávadus æládusaktisasjbargguj daj guokta suohkanij gaskan lij vuodo vaj guládallam álgaduváj. Maŋenagi nanos rádnastallam badjánij ja dát le vilá guovdátjin.

 

Aktisasjbarggosjiehtadus vuolláj tjáleduváj gålgådismánon jagen 1992 ja le joarkeduvvam moaddi. Udnásj sjiehtadus doajmmat gitta jahkáj 2008. Ulmme aktisasjbargujn Kirisji ja Divtasvuona gaskan le náv tjáledum:

”Nannit ja åvddånahttet nanos rádnastallamav ja ráddnádilev suohkanij ja daj álmmugij gaskan vuodojn aktisasj berustimij ekonomalasj, sosiálalasj ja sebrudagálasj dåjmaj”

Li læhkám moadda guosse daj guokta suohkanij gaskan. Sihke ruossja ja vuona bielen prosjækta le politihkalasj ja háldadus jådedibmáj lahka tjanádum. Valla aj dábálasj viesádij gaskan berustibme aktisasjbargguj le stuorre læhkám.

 

Konkrehtalasj æládusaktisasjbarggo ij le doajmmaj biejadum, valla dav ulmusjgasskasasj vuodo mij le ásaduvvam le buorre vuodo åvddånahttemis boahtteájggásasj æládusvuorodimes Ruossjajn.

 

Jage aktisasjbargujn Kirisji ja Divtasvuona gaskan le suohkanij álmmugijda buorre máhtudagáv vaddám mij guosská ráddnáálmmugav ja sijá kultuvrav, masi gallegattja dåbddin åvddål jagen 1992. Kultuvrra le vuona álmmugav ienemusáv vaddám, madi birás- ja luonndomuossádusá li jáhkedahtte ienemusáv ruossja álmmugij vaddám.

 Duodden almulasj aktisasjbargguj prosjæktaájgen, le priváhta berustibme mav viesáda daj guokta suohkanijn li åvddånahttám ájnas oasse læhkám. Uddni moattes Kirisjis Divtasvuonan årru.

 

Per Arne Ráhka le Divtasvuona prosjæktajådediddje aktisasjbargon Kirisji ja Divtasvuona gaskan.